دبئی کا 2025ء تک ڈھائی کروڑ سیاحوں کو بلانے کا پلان

متحدہ عرب امارات کی ریاست دبئی کی نظریں ایکسپو 2021 کی کامیابی کے بعد اب 2025 تک ڈھائی کروڑ سیاحوں کو اپنی طرف راغب کرنے کی منصوبہ بندی پر کام کررہا ہے اور اس کیلئے امارت معیشت اور سیاحت کے محکموں کو ضم کرنے کا ارادہ رکھتی ہے۔

دبئی کے ولی عہد شیخ حمدان بن راشد آل مکتوم نے ٹوئٹر پر اپنے پیغام میں کہا کہ ہلال المری کو دونوں محکموں کے انضمام سے معرض وجود میں آنے والے نئے محکمہ کا ڈائریکٹرجنرل مقرر کیا جائے گا۔

حاکمِ دبئی شیخ محمدبن راشد آل مکتوم نے کہا ہے کہ نئے محکمے کےاہم مقاصد میں اگلے پانچ سال کے دوران میں صنعتی شعبے کی اضافی قدرمیں 150 فی صد اضافہ ، مقامی مصنوعات کی غیرملکی برآمدی منڈیوں تک رسائی میں 50 فی صد توسیع اور سیاحوں کی تعداد میں 40 فیصد اضافہ شامل ہے۔

دبئی میڈیاآفس کی اطلاع کے مطابق انھوں نے مزیدکہا کہ امارت آیندہ تین سال میں ایک لاکھ کمپنیوں کو راغب کرنا چاہتی ہے،2025ء تک سالانہ 400 عالمی اقتصادی تقریبات کا بھی اہتمام کرنا چاہتی ہے اورنجی شعبے کی کمپنیوں اورخاندانی کاروباروں کو دبئی میں مالیاتی منڈیوں اور اسٹاک ایکسچینج میں اندراج کرانے کی ترغیب دینا چاہتی ہے۔